TOMÁS BOULLOSA PRESENTA UNHA MOCIÓN PARA QUE SE ACONDICIONEN ESTAS PISTAS
O BNG demanda actuacións nas pistas de Sabaxáns, en Bértola
infobloque-vilaboa.com | 11/01/10 |  (0) |
|
O concelleiro do BNG, Tomás Boullosa Moure, ven de presentar unha moción para o seu debate no vindeiro pleno ordinario, na que se demanda a mellora dos viais do barrio de Sabaxáns, na parroquia de Bértola. Os veciños láianse do mal estado das pistas xa que están cheos de pronunciados baches. O problema máis preocupante é na pista que vai pegado ao río que transcorre por alí, xa que a auga destruíu parte da pista e isto supón un perigo para os coches que transitan por ela, ao atoparse xusto nunha curva.
Na moción, Boullosa Moure solicita ao goberno municipal o acondicionamento destes viais para que non se dea máis esta situación. Este vial é un exemplo máis do calamitoso estado de moito dos viais municipais do noso concello, como xa se deixou evidencia noutras ocasións coa presentación de mocións polo grupo do BNG, e aprobadas en Pleno, solicitando o seu acondicionamento e reparación, e que a día de hoxe moitas aínda non foron arranxadas.
"O goberno municipal, ante a catastrófica situación deste e outros viais, debe acometer un programa de actuación a medio prazo no que, primeiro se lle dea prioridade aos viais que necesitan unha urxente reparación xa que en moitos casos son case intransitables, e segundo que o goberno municipal sexa rigoroso con todas aquelas actuacións que se levan a cabo neles, como obras de acometidas de saneamento, abastecemento de auga, realización de muros, etc que implican un deterioro dos viais e que ao finalizar as obras non se arranxan como é debido e que provoca un enorme deterioro dos viais, en algúns casos recen asfaltados" afirmou o concelleiro nacionalista.
 comenta esta noticia |
    
|
