X. César Blanco Poceiro Responsábel local do BNG de Vilaboa

12-11-2008

"Que nos gobernen Los del Rio"

O estrano titular que vos propoño ven a conta daquela campaña electoral para o fiasco de referéndum  da Constitución Europea de hai uns anos. Daquela o Psoe valérase de moita xente do mundo da cultura e do espectáculo para facer a súa campaña a prol do sí, e entre eles  o famoso dúo sevillano intérprete da popular canción da Macarena, Los del Río. Pois ben, estes dous individuos utilizaron un argumento pouco convencional pero  moi simpático, así como eles son, e viña a decir algo así; “… zi los  que mandan, que zon los que zaben, dicen que hai que votar sí, pueh, nozotros votamos que zi…”. A todas luces un argumento extravagante, pero que coa graza e o poderío  desta xente ata pode chegar a ser convincente.

Un argumento parecido a este é utilizado a menudo polo Partido Socialista, tanto a nivel galego como local. A nivel galego reseñar a última do presidente Touriño, rexeitando e tachando de autártica e electoralista a iniciativa do noso portavoz nacional Anxo Quintana de crear o Instituto Galego de Crédito Oficial para potenciar a economía produtiva e un  portelo único ao que puideran acudir as empresas para buscar apoios, ao tempo que permitise ás caixas de aforro participar no capital de risco. Touriño unha vez máis voltou a mostrar o seu verdadeiro rostro, o dun político carente de inciativas, sen voluntade política para afrontar os problemas dende unha perspectiva galega e agochándose tra-las de Zapatero. Un ZP que non dubida en entregarlle á banca 150 mil millóns de euros non se sabe a quén, nen para qué, e pola contra impiden que Astano poida construir buques civís como propuxera o noso conselleiro de Industria, un plan que contaba co apoio financiero das caixas e no que estaba implicado o empresariado naval galego. Iso si eran medidas reais para afrontar a crise. Touriño prefere o método tradicional do PP que aplicou durante os 16 anos da era Fraga. Nada de crear organismos transparentes e democráticos e sometidos ao control político, el prefere o reparto de cheques, para que quen o recibe lle quede constancia a quen lle debe o favor. Dice que ten 1.500 millóns para repartir entre as empresas. Esperemos que non os reparta Patxi Vázquez, o de Medio Ambiente, porque xa sabemos como as gasta o de Carballiño, e se non que llo pregunten aos colectivos ecoloxistas. A todo isto Touriño aínda non concretou por qué esta medida exposta por Quintana e autártica e electoralista.

Na política local pasa algo similar, o grupo de goberno socialista nunca ten un criterio propio á hora de definirse políticamente nos temas importantes que nos afectan. Alguén coñece o criterio dos Psoe como tal no tema da reforma da N-554?  Alguén coñece o criterio do Psoe de Vilaboa no asunto da afección da Brilat? O único que declararon públicamente é que non ían ir contra Defensa.  Alguén coñece o criterio do Psoe local sobre o PXOM? E así poderíamos seguir. Eles sempre escóndense  e escusanse sempre  en esperar as decisións dos técnicos, que normalmente toman as decisión en función das instruccións políticas que se lle dean, e a ver que dí o “pueblo” e os demáis partidos. Sobre todo o que dí o Bloque, porque eles saben que é o único partido que en cada asunto ten un criterio decidido. Pode ser máis ou menos acertado, pode gustarlle a uns e repatearlle a outros, pero saben que teñen criterio e que case sempre acertan. E despois  opinan eles, como o que compra o número de gordo unha vez que pasou o sorteo, xa non ten mérito nen premio.

Por iso propoño que nos gobernen Los del Rio. A política que fai o Psoe local son capaces de facela eles perfectamente, e  que tardes de espectáculo nos ían dar nos plenos. Imaxinádesvos  ao dúo Romero e Ruíz nas cadeiras de Luis e Paco coa guitarra ao carón e que cando as cousas se puxeran tensas botaran man dela e postos en pé lle mandaran aquilo de “…eeehhhh Maaacaaareeenaaaaa, aiinnnn…”

comentarios recibidos (6)

OPINIÓNS ANTERIORES

(19/10/08) " Hai que ser serios"

(02/09/08) " O sr. feijoo e os muiños de vento"

(24/08/08) " O extraño caso do dr. Jekyll e mr Hyde"

(20/08/08) " Os piratas da Enseada de San Simón. O cofre do presuposto morto"

(07/08/08) " Se as contas non saen, que voten os mortos "

(21/05/08) " O Psoe non é de fiar...!"

comenta este artigo

VOLTAR Á PORTADA