X. César Blanco Poceiro Responsábel local do BNG de Vilaboa

07-08- 2008

"Se non saen as contas, que voten os mortos. "

Nestes días andan ocupados os partidos políticos en Galiza co asunto da reforma do voto emigrante. Este foi sempre un asunto polémico, xa que a limpeza deste proceso queda sempre en entredito eleición tas eleición. Cando gobernaba o PP, tanto o BNG como o Psoe non aforraban calificativos á hora de criticar a política popular dirixida á emigración. Enténdase as contínuas viaxes de Don Manuel a Latinoamérica, os repartos de axudas en actos partidarios, viaxes de axentes electorais a cargo de fondos públicos, e por suposto os mortos votando nos procesos electorais, non se sabe ben se dende o ceo ou o inferno.

Pero chegou o cambio no goberno. Dos que entonces criticaban tales feitos, agora xa instalados na moqueta (enténdase o PSOE), era de esperar unha reforma que atallara todas esas regularidades antidemocráticas, pero velahí que transcorrida maís dunha lexislatura de goberno socialista a cousa non mellorou nada, senón que máis ben empeorou. Agora queren que tamen os netos disfruten da bicoca que é poder decidir nun goberno sen asumir nengún risco de padecer as consecuencias .

O Psoe deuse conta de que un número de eleitores similar ao da provincia de Ourense ou Lugo, extremadamente fáciles de manipular debido ao indecente procedemento de exercer o voto, non se pode desprezar, e máis se cabe, en época de vacas fracas electorais como as que se aveciñan. Déronse conta de que este eleitorado vota sempre poder, goberne quen goberne, e así se demostrou nas derradeiras eleicións xerais, onde o Psoe intercambiou co PP o resultado das anteriores.

E agora acércanse as eleicións galegas, e os socialistas repasando a lexislatura, teñen máis ben pouco que ofrecer á cidadanía en canto á xestión levada a cabo polas súas consellerías no goberno bipartito da Xunta. A persares de que cara o seu consumo interno aspiren a superar ao PP nas próximas eleicións, no fondo saben que como moito poderán manter os resultados actuais. A labor socialista no goberno galego, continuista da do PP non pasa desapercibida diante da cidadanía, e cunha crise económica planeando por riba das nosas cabezas, a punto da aterraxe, fai que o Psoe necesite do voto emigrante convenientemente manipulado para salvar os mobles. E todo isto aínda que sexa a costa de incumplir o pacto de goberno bipartito no referente ao voto emigrante, argumentando disparates tales como as dificultades técnicas expostas pola vicepresidenta De La Vega como a compra de urnas e diverso material necesario.

E que cando non se fixeron os deberes nen se estudiou durante o curso non queda máis remedio o día do exame que intentar dar o cambiazo a última hora e se as contas non saen, tranquilos que votarán os mortos.

OPINIÓNS ANTERIORES

(21/05/08) " O Psoe non é de fiar...!"

comentarios recibidos (1)

comenta esta opinión

© BNG Vilaboa 2007-2008| Inicio | Nós| Escríbenos