O pleno aproba unha moción do BNG para que o Vilaboa inicie os trámites para o deslinde definitivo con Marín

O PSOE admite que non revisou o informe de avaliación medioambiental do novo PXOM de Vilaboa

(infobloque-vilaboa.com 01/05/08) O Pleno do mes de abril do concello de Vilaboa, volveu a dar unha mostra máis de que o PSOE goberna este concello co "piloto automático" activado. A falta de implicación dos concelleiros na súa tarefa de control dos asuntos importantes para Vilaboa manifestouse onte nos temas abordados. En todos eles o equipo de goberno fixo gala da súa incapacidade para gobernar e simplemente se limitaron a facer oposición á oposición. O BNG estase destacando nesta lexislatura como a única organización con capacidade para poñer os temas importantes para Vilaboa enriba da mesa, namentras que os outros partidos se limitan á presentación de mocións "standard" de escaso interese político ou social para Vilaboa, ou en facer oposición á oposición no caso de goberno.

No primeiro dos temas tratados, o PSOE co apoio neste caso do PP, rexeitaron o recurso interposto pola Comunidade de Montes de Figueirido, contra a decisión de designar o campo do Cabalo en Cobres, como candidato a acollerse aos programas da Deputación Provincial para a instalación de herba sintética no terreo de xogo. O recurso incidía que non se garantizou a ecuanimidade dalgúns concelleiros á hora de exercer a votación. O equipo de goberno argumentou que estaba fóra de prazo facendo unha interpretación algo particular da lei, ao non admitir o último día do prazo como hábil para a admisión do recurso. En realidade a lectura que se desprende desta decisión é a de que para o PSOE parte dos veciños deste concello, non son merecedores de que o alcalde "se honre" a escoitar as súas demandas. Dende o BNG entendemos que son cando menos, realistas e merecen ser debatidas en profundidade.

A presentación do informe da avaliación medioambiental do novo PXOM deixou en evidencia ao equipo de goberno ao descoñecer que o documento contén erros de bulto como a ubicación da casa de cultura de Riomaior na parroquia de Cobres, ou o esquecemento dos locais sociais de Bértola e Figueirido entre outros erros. O portavoz do BNG, Xabier Míguez acusou ao equipo de goberno do ter lido o documento, o que se traduce nunga grave deixadez de funcións. O Alcalde ante a evidencia, contestou co seu argumento habitual de que son os demáis os culpables e incidindo nos ataques persoais se entrar en nengún momento no fondo do asunto.

O pleno tamén aprobou unha moción do BNG para instar ao Concello de Vilaboa a iniciar o deslinde do seu término municipal co de Marín. O BNG puxo en coñecemento dos membros da corporación municipal a intención de que comunidades de montes limítrofes dos dous concellos ían iniciar o deslinde e o amolloamento das súas respectivas propiedades, invadindo unha competencia exclusiva municipal como é a de establecer os límites xeográficos do Concello. O PSOE manifestara unha vez máis o seu descoñecemento ante esta iniciativa.

comenta esta noticia

 

máis noticias

© BNG Vilaboa 2007-2008| Inicio | Nós| Escríbenos