O BNG PRESENTA UNHA NOVA BATERÍA DE PREGUNTAS
Fomento insiste en que as obras de reforma da N-554 rematarán este ano
infobloque-vilaboa.com 14/06/10 |  (0) |
|
O Ministerio de Fomento vén de contestar á unha iniciativa presentada polo BNG no Congreso dos Deputados sobre as obras na N-554. Nesta iniciativa, Olaia Fernández Davila, preguntaba ao Ministerio sobre o prazo de finalización da obra, sobre o pago das expropiacións e sobre a expropiación do Consultorio Médico de Cobres.
No que respecta á finalización da obra, o Ministerio contestou que o prazo previsto para o remate da obra é o segundo semestre deste ano 2010, pero, a xuízo dos nacionalistas non parece que vaian a cumprir este prazo. “Segundo están avanzando as obras non parece que vaian a cumprir este prazo, xa que falta gran parte do trazado, como varios tramos de beirarrúas e urbanización, todas as rotondas previstas a face e a ponte de Riomaior. O ritmo de traballo tampouco é que sea moi continuo e amplio e o descontrol é absoluto”, afirmou Ornela Fdez. Salgado, voceira nacionalista.
Outro problema importante que destacaba a deputada era o do pago das expropiacións. Segundo o Ministerio, están pendentes de pago por Dépositos Previos unha cantidade de máis de 58 mil euros, pero, ademais, están pendentes de tramitar expedientes por unha cantidade aproximada de 9 millóns de euros en concepto de Mutuos Acordos.
Por último, no que respecta á expropiación do edificio do Consultorio de Cobres, o Ministerio responde que non foi necesaria a súa expropiación, pero que a obra suporá unha mellora das condicións de accesabilidade e de dotación de aparcadoiros. “ A expropiación deste inmoble era algo básico e primordial porque, ainda que alí van beirarrúas, non deixa de ser unha mala ubicación para un centro como este e, ademais, non se aproveitou de maneira óptima a zona de aparcadoiros cercana ao edificio, xa que alí poderían habilitarse máis prazas que as que hai actualmente”, dixo a voceira nacionalista.
A semana pasada, a deputada nacionalista, tamén presentou outra batería de preguntas sobre as obras desta estrada. Nesta nova iniciativa solícitase información ao Ministerio de Fomento sobre as continuas paralizacións e baixo ritmo das obras; sobre o acceso ao adro e Igrexa de Santa Cristina de Cobres; sobre o acceso ao vial das Salinas e sobre se manteñen a previsión de construcción das nove rotondas. “ O acceso ao vial das Salinas é un exemplo da falta de criterio e coordinación coa que se están levando a cabo as obras desta estrada. Non é de recibo que, mentras noutros puntos o Ministerio non acepta a permanencia de accesos polo perigo que, segundo eles, supoñen, neste acceso a un vial tan transitado como é o das Salinas, fagan un deseño tan desastroso, non permitindo o paso de dous vehículos ao mesmo tempo e, por tanto, obrigando a esperar para poder acceder, entorpecendo a circulación. Despois de que nós o denuncíasemos intentouse facer unha pequena reforma, pero o problema segue existindo. O ideal sería ampliar a curvatura dos arcens para poder ampliar o acceso”, rematou Fdez. Salgado.
 comenta esta noticia |
|
