OUTRO EXEMPLO MÁIS DA IMPUNIDADE DE FOMENTO ANTE UN GOBERNO LOCAL AUSENTE
As leiras de Paredes seguen sen auga de rego

infobloque-vilaboa.com | 07/05/10 | (0)

Xa transcorreu máis de ano e medio desde que, no pleno do mes de outubro do 2008, a corporación local de Vilaboa aprobase, por unanimidade, unha moción do BNG na que se solicitaba que o Concello de Vilaboa reparara con carácter inmediato o lavadoiro do Xogo da Pía, solucionando a perda de auga que este sufriu nos últimos anos, sen que, por parte do goberno municipal, se fixese algunha xestión para acometer este acordo plenario.

Hai que recordar que o lavadoiro do Xogo da Pía é un ben inventariado municipal situado en Paredes, parroquia de Vilaboa. Foi gravemente deteriorado polo Ministerio de Fomento cando realizou o cambio da conexión da pista das Salinas coa N-550. Daquela, Fomento derrubou o tellado e o Concello de Vilaboa, nunha clara deixación de funcións, permitiu que fose reparado como o ministerio quixo. Nin sequera esixiu o cumprimento da lexislación urbanística galega para que empregase na repación elementos tradicionais como a pedra en lugar de columnas de formigón.

Sen embargo, segundo xa denunciara o BNG naquel momento, o máis grave veu despois e na actualidade séguense padecendo as consecuencias: o lavadoiro perdeu a auga e, polo tanto, hoxe é un elemento completamente inútil que non cumpre ningunha función. “Neste caso, os veciños e veciñas de Paredes non poden facer uso do lavadoiro e pozo de rega pola neglixencia do Concello, que non actuou con dilixencia no mantemento e conservación dun ben público. A estas alturas, o problema segue existindo, o lavadoiro segue sen repararse e os veciños e veciñas de Paredes seguen sen poder utilizar o lavadoiro como o uso tradicional que tiña, que era como pozo de regadío. Os propietarios das veigas alí existentes non poden traballalas porque lles falta a auga para os cultivos, e os que as traballan teñen que utilizar caldeiros de auga para poder regar”, declarou Ornela Fdez. Salgado.

O BNG quere que o goberno municipal explique por qué ainda non se arranxou este problema e que dea conta das xestións, se houbo algunha, que fixo diante de Fomento para que o Ministerio pagase os gastos ocasionados como causante do feito.

comenta esta noticia

NOTICIAS RELACIONADAS