Por Ornela F. Salgado, voceira municipal do BNG

Ao día a día nos remitimos.

Segundo a teoría política, todos aqueles que se adican á política deben posuír tres calidades fundamentais: a primeira, o compromiso e lealdade  coa sociedade civil e política a que pertence e que representa; a segunda, ter capacidade para desempeñar as responsabilidades do seu cargo e gobernar dando resolución ás demandas da cidadanía; e a terceira, e a máis difícil de alcanzar, posuír virtudes éticas para saber gobernar. 

Segundo a Real Academia Galega, ética é o conxunto de normas establecidas polo costume, que regulan as relacións e o comportamento na sociedade ou nos distintos ámbitos da actividade humana. A ética política, por tanto, pode definirse como a parte da ética que se ocupa dos principios ou normas de acción que deben dirixir o comportamento do político na súa calidade como gobernante. A ética política vai unida ao alcance do ben común. Todo gobernante, unha vez chegado ao poder, ten que ter presente a ética nas súas manobras e movementos para poder alcanzar o ben común. Un goberno ten éxito cando a súa política e os seus feitos satisfagan as necesidades e aspiracións do seu pobo e estas contribúan ao seu progreso. O ben común é o principio e fin ético da política.

Gobernar é servir aos intereses comúns, ao interese xeral. Este, e non outro, debe ser o motor que impulse aos políticos, aos gobernos e gobernantes.

Desde a Grecia clásica, da man de Platón ou Aristóteles, ata a época máis actual, con Riker ou Habermas, todos eses filósofos e teóricos estudiaron cal era o modelo máis idóneo de conseguir o ben común. Sen lugar a dúbidas, a premisa máis adoptada é que o bo goberno é aquel que é forte e estable, aquel que ten uns obxectivos claros e que defende os intereses de todos os seus cidadáns. Aquel que non antepón os seus intereses particulares e partidistas aos intereses de todos, do seu pobo, ao ben común. 

Preguntarédesvos que a que se debe toda esta exposición sobre teoría política, pois non ten outro propósito máis que a simple comparación co goberno do PSOE de Vilaboa. Nun dos últimos plenos o alcalde, o Sr. Poceiro, deleitounos con unhas declaracións nas que dicía que o seu único obxectivo político era que o BNG non gobernase Vilaboa. Exemplo de que o ben común, os intereses de todos non é o que máis interesa a quen nos goberna. 

Falaba, parágrafos atrás, de que para alcanzar o ben común fai falta ter un goberno forte e estable, cousa coa que, actualmente, non podemos contar. Lembrade que en maio de 2007 todos os veciños e veciñas acudiron ás urnas, e pese a que o reconto nos dou escenas de verdadeira euforia, vida a menos co transcurso da noite, por parte dos que pensaban que isto de gobernar en maioría ía ser pan comido, os votos demostraron que os cidadáns querían un goberno múltiple e non formado por un único partido, un goberno forte e estable que ofrecera un proxecto de futuro para Vilaboa e aproveitase as oportunidades que ofrecía o goberno da Xunta de Galiza. 

Un ano despois, o clima político de Vilaboa segue sendo o mesmo que nos catro anos anteriores a esa cita de maio do 2007. O goberno do PSOE non quere entender que os veciños non lle outorgaron a maioría que con tanta precipitación eles xa celebraban, e antepoñen os seus intereses ao interese xeral.  

O goberno do Sr. Poceiro non é capaz de sacar adiante ningún proxecto, e é falto de ideas. O único que si sabe é facer oposición da oposición. Moléstalle cando o BNG pon en riba da mesa ideas, cando facemos xuntanzas cos veciños porque hai un problema que resolver e queremos escoitalos e darlle solución, cando criticamos a xestión do grupo de goberno, cando non votamos unha proposta de orzamentos débiles e fracos de inversións e proxectos, pero con un abundante gasto ordinario, cando somos intransixentes con unha postura de pasotismo e falta de palabra cos acordos plenarios e compromisos pola N-554... 

Os seus reproches son sempre con un ton nada agradable, chegando, cando hai falta de argumentos á falta de respecto e, incluso, ao insulto.  

Verdadeiramente, credes que este Alcalde e o seu equipo cumpre cos requisitos que un bo goberno e gobernante deben ter? Pensades que é o interese xeral e o alcance do ben común o que move a política levada a cabo polo goberno do PSOE? 

Ao día a día me remito.

EDITORIAIS ANTERIORES

(06/08/08) Con este goberno, vaiche boa Vilaboa!

comentarios recibidos (1)

comenta este editorial

 

máis noticias

© BNG Vilaboa 2007-2008| Inicio | Nós| Escríbenos