O GRUPO MUNICIPAL DO BNG CONSTATOU UNHA PARÁLISE DAS OBRAS TANTO EN VILABOA, BÉRTOLA E FIGUEIRIDO
As obras do AVE tamén paradas
infobloque-vilaboa.com | 23/06/10 |  (0) |
|
O BNG de Vilaboa constatou que as obras do AVE ao seu paso polo termo municipal están practicamente paralizadas debido á falta de liquidez económica das empresas que efectúan ás obras ao non poderen afrontar os incumprimentos económicos por parte do Ministerio de Fomento.
Esta paralización, da que se descoñece o prazo, pode ser de varios meses. De feito, o ministro Blanco falou xa de retraso dun ano na posta en marcha do AVE Vigo-Pontevedra, agora datado para o ano 2013.
Isto ten e vai ter graves consecuencias no noso termo municipal. En primeiro lugar, moitos traballadores veciños do noso concello xa foron enviados para as súas casas, contribuíndo a aumentar as nosas intolerables taxas de paro, no entorno dos 600 parados.
A paralización tamén vai ter conseuencias nas parroquias de Vilaboa, Figueirido e Bértola polo abandono en que estarán unhas grandes obras no medio de núcleos densamente habitados como Paredes, Balteiro ou O Alcouce. O abandono significa falta de mantemento nunha traza na que medrarán a silva e a xesta e emisións de pó ampliadas.
As infraestruturas viarias que foron pechadas polo AVE permanecerán meses pechadas: son pistas locais e estradas provinciais que foron cortadas para construír pasos elevados agora parados. Estradas pechadas e desvíos provisionais serán permanentes durante meses.
Vai ampliarse en meses, tamén, a falta de reposición das canles de rego das propiedades dos veciños. Tamén umentan exponencialmente con esta situación a posibilidade de que se reproduzan as enchentes do inverno pasado e os danos que produciron nas veigas e negocios.
Ante isto, o BNG solicita a inmediata xuntanza da comisión de obras do AVE creada a instancias do noso grupo, e nunca reunida polo grupo de goberno a fin de adoptar as medidas necesarias para poñer fin a esta situación.
Así mesmo, o BNG trasladará ao Grupo Parlamentar das Cortes esta situación para que o ministerio de Fomento responda das medidas que pensa adoptar.
 comenta esta noticia |
|
